Шаш муҳоҷири тоҷикро, ки дар роҳ ба Русия ҷон бохта буданд, дар зодгоҳашон ноҳияи Қубодиён ба хок супориданд. Як манбаъ дар ҳукумати Қубодиён ба Радиои Озодӣ гуфт, маросими видоъ бо муҳоҷирон 25-уми май баргузор шуд.
Ба гуфтаи манбаъ, турбати шаш муҳоҷирро дар оромгоҳи деҳаи Зиракӣ дафн карданд.
Рӯзи 20-уми май як мошини муҳоҷирони тоҷик дар ҳудуди Қазоқистон ба садама дучор шуд. Дар ин ҳодиса шаш кас ба ҳалокат расида, панҷ тани дигар маҷруҳ шуданд. Аҳволи ду нафар аз захмиён вазнин гуфта мешавад.
Дар ин садама Аҳтам Каримови 36-сола, Назрулло Боқиеви 24-сола, Бахтигул Боқиеваи 40-сола, Юсуф Солиҳови 67-сола, Фаёзиддини Солиҳзодаи 35-сола ва Маҳмадюнус Аминзодаи 33-сола ҳалок шуданд.
Ҳазорон шаҳрвандони Тоҷикистон бо сабаби гарон будани нархи билети ҳавопаймо, тариқи роҳҳои заминӣ ба Русия мераванд.